[潮流飲食系列] 呢期新假期介紹好多芒果糯米糍，仲做咗個比較！即係咁，依家搞到周街都係長洲芒果糯米糍，我就唔信間間都係咁好食啦！咁岩果日行過旺角，見到一間新開張賣芒果糯米糍嘅鋪頭，新假期又冇介紹喎，咪買黎試吓囉！咁樣成件事都冇咁隨波逐流，人云亦云呀嘛！
個皮都算薄，而且個餡係原片芒果！(你實話間間芒果糯米糍入邊都係原片芒果架啦,有咩咁特別喎！) 嗱！今次你就啱喇！其實真係冇乜特別咖！不過佢好食囉！咁夠唔夠啊 ？（咁跟住你又實會問，有幾好食先！)即係咁！個芒果餡真係算好甜，而且個皮都唔算好厚，唔會好似食緊香口膠咁！不過呢又唔係完美嘅！佢個底唔知係咪因為太薄，竟然會黐住包住佢嗰個底紙！如果技術差啲，真係會成舊芒果飛咗出嚟架！
嗱！話晒我都試咗幾間買芒果糯米糍（長洲芒果糯米糍）嘅鋪頭，講真分別又真係唔係好大！但係呢一間嘅芒果肉又真係算比較甜所以都值得一試嘅！而且長洲糯米糍嗰間唔知係咪因為太多人幫襯，所以而家嘅質素好似有少少參差！
不過老老實實，＄10嘅價錢買到有大舊芒果嘅糯米糍，咁樣都已經值回票價啦！你仲想點喎！
糍到大王
旺角花園街（好景商場隔離)
Search